महिनाभरातील दुसरी कारवाई

रत्नागिरी, (जिमाका) – जमिनीच्या ७/१२ उताऱ्यावर नाव लावण्यासाठी रद्द केलेली फेरफार नोंद मंजूर करण्याच्या मोबदल्यात १० हजार रुपयांची लाच घेताना चिपळूणचे मंडळ अधिकारी उमेश राजाराम राजेशिर्के (वय ५२) यांना लाचलुचपत प्रतिबंधक विभागाने (एसीबी) आज रंगेहात ताब्यात घेतले. ही कारवाई सायंकाळी मुंबई-गोवा महामार्गावरील पाग नाका, पॉवर हाऊस परिसरात करण्यात आली.

तक्रारदाराने मौजे चिपळूण येथे भूमापन क्रमांक १७४/१अ ही जागा खरेदी केली होती. सदर जमिनीच्या ७/१२ उताऱ्यावर स्वतःचे व पत्नीचे नाव दाखल होऊन फेरफार मंजूर होण्यासाठी त्यांनी ग्राम महसूल अधिकाऱ्यांकडे अर्ज केला होता. त्यांनी ११ जून २०२६ रोजी फेरफार नोंद घातली होती; मात्र मंडळ अधिकारी उमेश राजेशिर्के यांनी ८ जुलै २०२६ रोजी ही नोंद रद्द केली.
त्यानंतर तक्रारदाराने २ ऑगस्ट रोजी महसूल कर्मचारी पतसंस्थेत राजेशिर्के यांची भेट घेतली असता, रद्द झालेली नोंद मंजूर करण्यासाठी राजेशिर्के यांनी १० हजार रुपयांच्या लाचेची मागणी केली. पुढे २३ व २७ ऑगस्ट रोजी फोन करून फेरफार नोंद मंजूर केल्याचे सांगत लाचेच्या रकमेसाठी तगादा लावला.
गाडीतच स्वीकारली लाच, एसीबीने आवळल्या मुसक्या

लाच देण्याची इच्छा नसल्याने तक्रारदाराने २ सप्टेंबर रोजी रत्नागिरी लाचलुचपत प्रतिबंधक विभागाकडे लेखी तक्रार नोंदवली. तक्रारीची पडताळणी दीपक लॉजसमोर भोगाळे येथे तक्रारदाराच्या गाडीत पंचांसमक्ष करण्यात आली, ज्यामध्ये लाचेची मागणी निष्पन्न झाली.
त्यानंतर सायंकाळी ६:०५ वाजता पाग नाका, पॉवर हाऊस येथील मुंबई-गोवा हायवेवर सापळा रचण्यात आला. तक्रारदाराच्या गाडीत येऊन पंचांसमक्ष १० हजार रुपयांची रोख लाच स्वीकारताना पथकाने मंडळ अधिकारी उमेश राजेशिर्के याला रंगेहात पकडून ताब्यात घेतले. याप्रकरणी चिपळूण पोलीस ठाण्यात भ्रष्टाचार प्रतिबंध अधिनियम १९८८ (सुधारणा २०१८) चे कलम ७ अन्वये गुन्हा दाखल करण्याची प्रक्रिया सुरू करण्यात आली आहे.
कारवाई करणारे पथक:
ही कारवाई ठाणे परिक्षेत्राचे पोलीस अधीक्षक शिवराज पाटील, अपर पोलीस अधीक्षक भागवत सोनावणे यांच्या मार्गदर्शनाखाली रत्नागिरी एसीबीचे पोलीस उपअधीक्षक अविनाश पाटील, पोलीस निरीक्षक मच्छिंद्र जाधव, पोलीस निरीक्षक सुहास रोकडे आणि अंमलदार उदय चांदणे, संजय वाघाटे, जनार्दन पवार, आशिष बल्लाळ, श्रेया विचारे, हेमंत राजेश गावकर, समिता क्षिरसागर व अजिंक्य पवार यांनी केली. लाचलुचपत विभागाचे आवाहन:
कोणत्याही शासकीय कामासाठी लाचेची मागणी झाल्यास नागरिकांनी लाचलुचपत प्रतिबंधक विभागाच्या १०६४ या टोल फ्री क्रमांकावर किंवा ७०३८३९१०६४ या व्हॉट्सॲप क्रमांकावर संपर्क साधावा.

महिनाभरातील दुसरी कारवाई
जमिनीच्या खरेदी खताची सातबारा उताऱ्यावर नोंद करून फेरफार मंजूर करण्याच्या मोबदल्यात ५ हजार रुपयांची लाच स्वीकारताना सावर्डे (ता. चिपळूण) येथील मंडळ अधिकारी अनिल दिलीप जाधव (वर्ग ३, महसूल विभाग) याला लाचलुचपत प्रतिबंधक विभागाने
५ आॕगस्ट रोजी रंगेहाथ पकडले होते. महिनाभरातील आजची दुसरी कारवाई आहे.